Прыйшла Каляда,
Дзверы адчыняйце!
Калядоўшчыкаў у хату
Шчыра запрашайце!

Каляда – гэта беларускае традыцыйна-абрадавае свята, якое ладзіцца ў гонар Сонца. Гэта адно з самых добрых i цёплых свят у Беларусi. Для земляроба час з кастрычнiка да снежня – перыяд замiрання прыроды. Ён верыў, што ў гэты час уладарання сцюжы, холаду, мяцелiцы, адбываецца барацьба дабра з ліхам, святла з цемраю. А з дня зiмовага сонцапавароту – «адраджэння» Сонца – пачынаецца новы год, якi абяцае прыход цяпла i святла, абуджэнне пладаноснай сiлы зямлi.

На Каляды ладзяцца розныя забавы i гульні. І ў нашы дні прыбраныя дарослыя і дзецi ходзяць па дварах і пры дапамозе кароткiх песень-калядак жадаюць гаспадарам шчасця і працвітання ў новым годзе.

У наш час Каляду святкуюць з 6 па 19 студзеня. У гэты час усе мы з нецярпеннем чакаем цуда. У ЦКРНіР стала традыцыяй сустракаць гэта незвычайнае фальклорнае свята. 13 студзеня, перад Старым Новым годам прайшлі «Святочныя калядкі». У гэты дзень дзеці сустракалі калядоўшчыкаў. Разам з прыбранымі героямі свята яны ўдзельнічалі ў традыцыйных калядных гульнях, вадзілі карагоды з Казой, частавалі іх прысмакамі, спявалі калядныя песні, запрашалі ўсіх у народныя гульні. Не абышлося і без прадсказанняў мудрай цыганкі, якая наваражыла дабрабыту, здароўя і ладу ва ўсіх сем’ях.

Свята адбылося вельмі цікавае. Удзельнічаючы ў падобных мерапрыемствах дзеці далучаюцца да культуры і традыцый беларускага народа.

Вялікую радасць на вуліцы, у хаты
Прынеслі Каляды – зімовыя святы.
Прынеслі забавы, і жарты, і песні,
Загадкі, і гульні, і танцы і песні.
Не спі, пані скрыпка, і бубен прачніся.
Калядныя святы ў нас пачаліся.